Viratec celebrou o 10 de marzo no Biopolo A Sionlla (Santiago de Compostela) unha nova sesión do seu ciclo Conversas de 10, centrada nesta ocasión nas estratexias de sostibilidade no sector da la. A xornada contou coa participación de David Allo, responsable de Sostibilidade de Texfor, nunha conversación coa presidenta de Viratec, Josefa de León.
Durante o encontro analizáronse os principais retos que afronta actualmente a industria téxtil en España e en Europa, nun contexto marcado pola transformación do sector cara a modelos máis responsables e polo crecente peso do marco regulamentario europeo. Así, abordouse a evolución normativa impulsada pola Estratexia da Unión Europea para os produtos téxtiles sostibles e circulares, que marcará as prioridades do sector nos próximos anos.
A conversa permitiu tamén reflexionar sobre a necesidade de definir con maior precisión o que se entende por sostibilidade na industria téxtil, un concepto cada vez máis ligado a cuestións como o ecodeseño dos produtos, a trazabilidade ao longo da cadea de valor, a durabilidade das prendas e a responsabilidade ampliada do produtor. Neste novo escenario, ferramentas como o pasaporte dixital do produto están chamadas a desempeñar un papel relevante para garantir a transparencia e o seguimento dos materiais e procesos.
Durante a sesión abordouse tamén o peso global da industria da moda e os desequilibrios que se producen no mercado internacional. Sinalouse que moitas empresas europeas e españolas operan en condicións regulamentarias máis esixentes, mentres que outros actores globais compiten con menores esixencias ambientais ou sociais, xerando situacións de competencia desigual. Así mesmo, destacou a complexidade de transformar un sector como o da moda, estreitamente vinculado a factores emocionais e culturais, onde as decisións de compra non sempre responden a criterios racionais. Por iso, apuntouse que unha parte importante da transformación do sector probablemente virá impulsada pola evolución do marco regulamentario, que está marcando o ritmo de cambio cara a modelos máis responsables.
Neste contexto de transformación, abordouse igualmente o potencial das fibras naturais e, en particular, da la, como recurso capaz de contribuír a modelos produtivos máis circulares. A sesión puxo de relevo a importancia de impulsar novas formas de valorización desta fibra, así como de avanzar cara a fórmulas que permitan reforzar o seu posicionamento no mercado, incluíndo iniciativas vinculadas á identificación da orixe e a denominación industrial dos produtos téxtiles.
Por último, o encontro subliñou a necesidade de reforzar a colaboración entre os distintos actores da cadea de valor, especialmente nun sector caracterizado pola presenza maioritaria de pemes e micropemes. Neste sentido, o establecemento de alianzas e espazos de traballo compartido perfílase como un elemento clave para afrontar os desafíos regulamentarios, tecnolóxicos e de mercado que marcarán a evolución do sector nos próximos anos.
O ciclo Conversas de 10, impulsado por Viratec, ten como obxectivo xerar espazos de diálogo entre empresas, centros de coñecemento e administración para compartir experiencias e analizar os retos vinculados á transición cara a modelos máis circulares e eficientes no uso dos recursos.
Pódese visualizar o encontro a través deste enlace
